Boston Celtics @ Golden State Warriors Tips - Warriors babawi sa Game 2

Naka-una ang Celtics sa best-of-seven series matapos nilang magtala ng 120-108 panalo sa Chase Center noong Huwebes.

Lamang ang Warriors ng 12 puntos papasok ng fourth period bago nag-init ang Celtics at tuluyang dinomina ang huling quarter 40-16. 

Nagbuslo si Al Horford ng 6 three-pointers at nagtapos ng 26 puntos sa kanyang kauna-unahang finals appearance para pangunahan ang Boston. Nagdagdag si Jaylen Brown ng 24 puntos at 7 rebounds habang nag-ambag ng 21 puntos mula sa bench si Derrick White.

Maganda rin ang nilaro nina Marcus Smart (18 puntos) at Jayson Tatum (12 puntos, 13 assists).

Nasayang ang 34 puntos ni Stephen Curry para sa Warriors, na hindi na nakaporma sa fourth quarter matapos nilang umiskor ng 38 puntos sa third period. 

Nagdagdag si Andrew Wiggins ng 20 puntos habang nagtala si Klay Thompson ng 15 puntos. Naglista si Otto Porter ng 12 puntos mula sa bench habang nakakuha ng 11 rebounds si Draymond Greene. 

Ito ang unang beses na natalo ang Golden State ngayong play-offs. Umaasa si Warriors head coach Steve Kerr na hindi na mauliti ang kanilang fourth-quarter collapse sa larong ito at determinado silang itabla ang serye bago lumipat sa Boston para sa Game 3 at Game 4. 

Nagbuslo si Curry ng 6 three-pointers sa first quarter ng Game 1 ngunit isang triple na lang ang kanyang naipasok sa natitirang bahagi ng laro.