Dallas Mavericks @ Golden State Warriors Tips - Warriors tatapusin ang serye sa Game 5

Nakalasap ng 119-109 kabiguan ang Warriors sa Dallas noong Martes matapos nilang magwagi sa unang tatlong laro ng best-of-seven series.

Nagtapos si Luka Doncic ng 30 points, 14 rebounds at 9 rebounds para pangunahan ang Mavericks at magpuwersa ng isa pang laro pabalik sa City by the Bay. Ito ang ikalawang sunod na laro na nagtala ng double double ang Slovenian superstar.

Nagpakitang gilas din ang ibang manlalaro ni Dallas head coach Jason Kidd. Nagtala si Dorian Finney-Smith ng 23 puntos habang nag-ambag ng 18 puntos si Reggie Bullock matapos niyang hindi maka-iskor sa kanilang 109-100 pagkatalo noong Game 3.

Naglista si Jalen Brunson ng 15 puntos habang nagtapos din ng double figures ang mga reserves na sina Maxi Kleber (13 puntos, 8 rebounds) at Spencer Dinwiddie (10 puntos, 8 assists). Tulad ni Bullock ay na-bokya si Kleber noong Game 3.

Si Stephen Curry ang nanguna para sa Golden State matapos niyang magtala ng 20 puntos at 8 assists. Nag-ambag si Jonathan Kuminga ng 17 puntos at 8 rebounds mula sa bench habang nagtala ang kanyang fellow reserve na si Jordan Poole ng 14 puntos. Sina Klay Thompson (12 puntos), Draymond Greene (10 puntos, 6 rebounds, 6 assists) at Moses Moody (10 puntos) ang ibang Warriors na naglista ng double digits.

Unti unting nakalayo ang Mavericks sa second quarter at nagtala ng 62-47 kalamangan sa half-time. Dinomina naman nila ang third quarter 37-23. 

Maganda ang naging shooting ng Mavericks sa Game 4 at ito ang naging susi sa kanilang pagputol sa four-game winning streak ng Warriors. Nagbuslo si Bullock ng 6 three-pointers habang nagpasok ng apat si Finney-Smith. Sa kabuuan ay naglista ng 20 triples ang Dallas. 

Ang tanong ngayon ay kaya kayang dalhin ng Mavericks ang kanilang magandang laro sa San Francisco, kung saan may 8-0 rekord ang Warriors ngayong play-offs. Tinambakan ng Golden State ang Dallas 112-87 sa Chase Center noong Game 1 at muling nanalo 126-117 sa Game 2.

Hindi nakalaro si Otto Porter para sa Warriors sa Game 4 dahil sa injury sa paa na natamo niya noong Game 3. Inaalam pa ang kaniyang kalagayan para sa larong ito. Game-time decision din si Andre Iguodala habang wala pa rin si Gary Payton II.