Miami Heat @ Boston Celtics Tips - Celtics muling magwawagi sa Game 3

Sinigurado ng Celtics na maitabla ang best-of-seven series sa 1-1 pabalik sa Boston matapos nilang tambakan ang Heat 127-102 sa Miami noong Huwebes. 

Umiskor si Jayson Tatum ng 27 puntos habang nagtapos si Marcus Smart ng 24 puntos, 12 assists at 9 rebounds para pangunahan ang Celtics. Naglista rin si Jaylen Brown ng 24 puntos at 8 rebounds habang nag-ambag si Grant Williams ng 19 puntos mula sa bench. 

Nagtala rin ng double figures sina big man Al Horford at back-up playmaker Payton Pritchard. 

Nanguna para sa Heat si Jimmy Butler na nagtapos ng 29 puntos. Naglista ng 14 puntos sina Gabe Vincent at Victor Oladipo habang nagdagdag ng 11 puntos si Tyler Herro mula sa bench. 

Maganda ang naging panimula ng Heat, na lumamang ng 10 puntos sa first quarter. Ngunit kaagad nakabalik ang Celtics sa likod ng mainit na shooting nina Pritchard at Horford. Nagpakawala ang Boston ng 17-0 run  para tuluyan ng kontrolin ang laro. 

Tinapyas ng Heat ang kalamangan ng Celtics sa 16 puntos sa third quarter ngunit gumanti ang mga bisita ng 12-2 run para muling lumayo.

Kapwa hindi nakalaro sina Horford at Smart sa kanilang 118-107 pagkatalo noong Game 1 ngunit nagparamdam naman sila sa Game 2. 

Nasaktan si PJ Tucker sa tuhod noong third quarter ng Game 2 at hindi na nakabalik sa laro. Inaalam pa ang kanyang kalagayan para sa Game 3. Muling hindi makakalaro sa Kyle Lowry para sa Heat dahil sa hamstring injury. Umiskor si Butler ng 41 puntos noong Game 1 at umaasa si Miami head coach Erik Spoelstra na muling magpasiklab ang All-Star guard sa kanilang hangarin na muling makuha ang home advantage sa serye.